Психолог Илүзә Әминова: Татар хатын-кызлары басынкырак, ир-атларга хезмәт итүче

«Хатын-кызның абьюзерга әйләнү сәбәпләре бик күп, аларның берничәсен әйтеп үтәм. Беренче сәбәп – хатын-кызның әтисез үсүе, яисә «проблемалы» әтиле булуы. Мәсәлән, гаиләдә «проблемалы» әти булса, хатынының аңа тискәре мөнәсәбәте, «мин үзем дә барысын булдырам», «анардан нәрсә алыйм», «анардан бары тик бетмәс проблемалар гына» диюләре кыз балада абьюзерлык сыйфатларын булдыра.

Икенче очрак – гаиләдә әни «баш» булган очракта. Әни абьюзер булса, кыз бала аны үрнәк итеп күрә, аңа охшап үсә. Өченчедән, әгәр кечкенә чакта баланың шәхси чикләрен бозсалар, кыерсытсалар, аңа көрәшеп-ярышып үсәргә туры килгән булса, бала абьюзер сыйфатларын ала.

Дүртенчедән, абьюзер сыйфатлары таләпчән, консерватив гаиләдә артык игътибар белән үстерелгән балаларда да очрый. Алар үзләреннән таләп иткән кебек, киләчәктә тормыш иптәшләренә дә таләпчан булалар. Мәсәлән, кыз егет белән аралашкан вакытта, егет аңа абьюзив мөнәсәбәт күрсәткән, һәм кыз шул «таган»да (эмоциональ качельләрдә) «атынган» икән, ул үзе дә шундый ук була. Бишенчедән, бала әти-әнисенең абьюзив мөнәсәбәтләрен күрә, кем абьюзер – шуны җиңүче, дип уйлый һәм бу гаилә әгъзасының үз-үзен тотышын кабатлый.

Бөтен милләт кешеләрендә дә абьюзерлар бар. Татар хатын-кызларына килгәндә, без басынкырак, ир-атларга хезмәт итүче. Тәрбия, менталитет белән бәйле рәвештә, бездә башка милләтләргә караганда абьюзерлар кимрәк, ләкин алар юк түгел», – ди ул.

Илүзә Әминова белән «Интертат» сайы өчен Фирүзә Гыйниятова сөйләште.

• Психолог Илүзә Әминова: «Татар хатын-кызлары арасында абьюзерлар әзрәк, ләкин юк түгел»