Төп герой - «КАМАЗ»: Чаллы театрында уникаль премьера әзерлиләр
Аяз Гыйләҗев исемендәге Чаллы татар драма театры «КАМАЗ» йөк автомобильләре җитештерелә башлауның 50 еллык юбилеена багышланган яңа спектакль сәхнәләштерергә әзерләнә. Бу хакта Бөтендөнья татар конгрессы матбугат хезмәте хәбәр итә.
«Чыкты атым күләгәдән» пьесасының авторы - Чаллының танылган драматург Артур Шәйдуллин. Ул үзенең иҗади эшләре белән труппага яхшы таныш.
Театрның сәнгать җитәкчесе һәм спектакльнең режиссеры Олег Кинҗәгулов сөйләгәнчә, хәрбиләргә яхшы таныш һәм хәзер алгы сызыктагы солдатларга актив ярдәм итүче «КАМАЗ-4350» йөк автомобиле премьераның үзәк герое булачак.
Бу спектакльнең төп үзенчәлеге булыр дип көтелә: сәхнәгә бутафор декорациясе түгел, ә чын, «күпне күргән» автомобиль чыгачак.
Ун артист катнашындагы беренче репетиция якындагы көннәргә билгеләнгән.