2025 елда Татарстан аэропортларында пассажирлар агымы 6 млн кешедән артып киткән
Узган ел Татарстанның өч аэропортында пассажирлар агымы 6 млн кешедән артып киткән. Бу 2024 ел белән чагыштырганда нибары 0,3 процентка кимрәк, дип белдерде ТР Транспорт һәм юл хуҗалыгы министры Фәрит Хәнифов ТР Транспорт һәм юл хуҗалыгы министрлыгы коллегиясе утырышында.
«Чикләүләр булуга карамастан, һава транспорты тотрыклы эш күрсәтә», - диде ул.
Министр сүзләренә караганда, республика аэропортларыннан Россия эчендә 64 юнәлеш оештырылган, шуларның 40ы – субсидияләнүче. Халыкара авиаочышлар 34 юнәлештә алып барыла. Шул исәптән 33 маршрут – Казан аэропортыннан һәм берсе «Бигеш» аэропортыннан башкарыла.