Казанда «Буран» планы төн уртасында төгәлләнәчәк

Татарстан башкаласында «Буран» планы төн уртасында төгәлләнәчәк. Бу хакта Казан мэриясенең матбугат хезмәте хәбәр итә.

5 февральдән сәнгать, музыка, спорт һәм сәнгать мәктәпләре, мәдәният йортлары һәм яшүсмерләр клублары гадәти эш графигына әйләнеп кайта, дип билгеләп үттеләр шәһәр администрациясендә.

Мәктәпләр һәм балалар бакчалары көндезге режимга бүген, 4 февральдә, кайттылар.

Шул ук вакытта шәһәрдә кар җыю эшләре дәвам итә. «Машиналарны урам-юл челтәре буйлап калдырмавыгызны сорыйбыз», – дип ассызыкладылар Казан мэриясендә.

ТР башкаласында гыйнвар ахыры-февраль башында айлык явым-төшем нормасының 70 проценты яуган. «Буран» планы 30 гыйнварда кертелде һәм 2 февральдә озайтылды.

Узган тәүлектә юлларны чистартуга 1110 берәмлек махсус техника һәм 692 юл эшчесе җәлеп ителде. Шәһәрдән 31,6 мең тонна кар чыгарылган, ә юлларны эшкәртү өчен 268 тонна бозлавыкка каршы материаллар кулланылган.

Бүген Казанда юлларны чистартуга 617 машина һәм 578 эшче чыккан, дип билгеләп үттеләр шәһәрнең Тышкы төзекләндерү комитетында.

Гомумән алганда, кышкы чорда Татарстан башкаласыннан кар эретү пунктларына 655,5 мең тонна кар чыгарылган. Казан юлларын эшкәртү өчен 45,5 мең тонна бозлавыкка каршы материаллар кулланганнар.