Татарстанда махсус хәрби операция ветераннарының 70 проценты диспансеризация узган

Узган ел Татарстанда хәрби хезмәттән азат ителгән махсус хәрби операция ветераннарының 70 проценты диспансеризация узган. Бу хакта ТР Дәүләт Советының Социаль сәясәт комитеты утырышында «Ватанны саклаучылар» дәүләт фондының ТР буенча филиалы җитәкчесе Гүзәл Удачина хәбәр итте.

«Еллык диспансеризация – сәламәтлек саклау учреждениеләренең генә түгел, фондның да бурычларының берсе. Быел безнең барлык егетләр дә киңәйтелгән форматта диспансеризация узарга тиеш, алга таба диспансер күзәтүе, кирәк булган очракта медицина тернәкләндерүенә чыгу», - дип сөйләде ул.

Удачина билгеләп үткәнчә, дәүләт фондының шәхси комплекслы озатуында хәзер 18 меңгә якын кеше, шул исәптән СВО ветераннары һәм аларның гаилә әгъзалары, шулай ук һәлак булган сугышчыларның һәм хәбәрсез югалганнарның гаилә әгъзалары бар.

Удачина махсус хәрби операциядә катнашучылар өчен федераль ярдәм чаралары, шулай ук Татарстан Республикасы буенча 24 республика, 16 муниципаль һәм 12 «Ватанны саклаучылар» фонды гамәлдә, дип өстәде.

«Бүгенге көндә Дәүләт Думасы тарафыннан махсус хәрби операциядә катнашучыларга һәм аларның гаилә әгъзаларына карата төрле ярдәм чараларын билгели торган 130дан артык федераль закон кабул ителде», – дип билгеләп үтте ул.

Алар бушлай чираттан тыш беренчел медицина-санитария ярдәме, махсуслаштырылган, шул исәптән югары технологияле медицина ярдәме, паллиатив медицина ярдәме алырга хокуклы.