Татарстанда ятим балаларны торак белән тәэмин итүгә 10 миллиард сум акча юнәлдерелгән
Татарстан Республикасы Җир һәм милек мөнәсәбәтләре министрлыгы коллегиясенең киңәйтелгән утырышында министр Фәнил Әһлиуллин ятим балаларны торак белән тәэмин итүнең барышы турында доклад ясады. Бу хакта ведомствоның матбугат хезмәте хәбәр итә.
Аның сүзләренчә, ятим балаларга ярдәм итү республика социаль сәясәтенең төп өстенлекләреннән берсе булып кала. 2013 елдан Татарстанда бу категория гражданнарга 5 796 фатир бирелгән. Финанслауның гомуми күләме 10 миллиард сумнан артып киткән.
2025 елда ятим балалар арасыннан тагын 450 кеше торак алган. Шул ук вакытта, торак белән тәэмин итүдә ихтыяҗ арта бара. 2025 ел ахырына 2 644 кеше исәптә торган, бу 2022 елгы күрсәткечләрдән ике тапкырга күбрәк.
Министр билгеләп үткәнчә, мондый динамика барлык җәлеп ителгән ведомстволар әлеге категориягә кергән гражданнар белән тагын да тыгызрак һәм системалырак хезмәттәшлек итәргә тиешлеген күрсәтә.