Анапа техникумында атыш нәтиҗәсендә каравылчы һәлак булган
Краснодар крае губернаторы Вениамин Кондратьев хәбәр иткәнчә, Анапа индустриаль техникумында атыш нәтиҗәсендә уку йортының каравылчысы һәлак булган. Ул һөҗүм итүчене беренче булып туктатырга тырышкан һәм полиция чакыртырга өлгергән. Төбәк башлыгы аның туганнары һәм якыннарының кайгысын уртаклашты.
«Анападагы вазгыять буенча даими рәвештә оператив мәгълүмат алам. Гадәттән тыш хәл нәтиҗәсендә бер кеше һәлак булган, ул - һөҗүм итүчене беренче булып туктатырга тырышкан һәм хокук саклау органнарын чакырткан каравылчы. Һәлак булучының туганнары һәм якыннарының тирән кайгысын уртаклашам», - дип язган ул Telegram-каналда.
РИА Новости агентлыгы мәгълүматы буенча, студент техникум холлында ут ачкан. Ким дигәндә ике кеше зыян күргән. Зыян күрүчеләрнең ничә кеше булуы турында мәгълүмат ачыклана. Студент тоткарланган.
Кондратьев әлеге хәлне «коточкыч җинаять» дип атады, көч структураларына һәм Росгвардиягә оператив эш иткәннәре өчен рәхмәт белдерде.