Миңнеханов Чаллыда бөтенсоюз хезмәт эстафетасы символын бәяләде һәм музейга теләкләр язды
16 февральдә Чаллыда беренче КАМАЗ йөк автомобилен чыгаруның 50 еллыгына һәм шәһәрнең 400 еллыгына багышланган чаралар уза. Бу уңайдан автошәһәргә Татарстан Рәисе Рөстәм Миңнеханов килде.
Юбилей кысаларында махсус техника күргәзмәләре һәм тантаналы чаралар үткәрелә.
Тарихи һәм туган якны өйрәнү музееның горурлыгы – 14 бөтенсоюз удар төзелеше аша узган һәм бөек бөтенсоюз хезмәт эстафетасын тәмамлау символы буларак Чаллы шәһәрендә кабул ителгән комсомол төзелешләре эстафета факелы.
Рөстәм Миңнеханов шәһәрнең тарихы турында кызыксынып тыңлады һәм күчмә факелны карады. Татарстан Рәисе музейга теләкләрен язып калдырды.
Фото: Чаллы шәһәре мәгълүмати сәясәт һәм җәмәгатьчелек белән элемтә идарәсе.