Февраль ахырында Татарстанда салкыннар, бераз кар һәм көчле җил көтелә

Февраль ахырында Татарстанда салкыннар, кар һәм көчле җил фаразлана. Бу хакта ТР Гидрометеорология үзәге хәбәр итә.

Узган тәүлектә республика югары басым тәэсирендә булды: явым-төшем булмады, ләкин иртән томан һәм суык булды, ә төнлә җил урыны белән секундына 15-17 метрга кадәр көчәйде.

Бүген, 23 февральдә, атмосфера фронты якынаю сәбәпле урыны белән йомшак кар явуы күзәтелә, көчле җил 15-18 м/с тизлектә саклана, көндезге температура -3..-11°.

24 февральгә фаразлар буенча сизелерлек үзгәрешләр көтелми: болытлы һава, урыны белән бераз кар, җил тизлеге 15-18 м/с, төнге температура -10..-15°, көндез -5..-10°.

Чәршәмбе, 25 февраль һәм пәнҗешәмбе, 26 февраль, республика түбән басым кырында булачак. Бераз кар явуы көтелә, төнге температура -9..-15°, көнчыгышта -20°, көндез -4..-10°.

27 һәм 28 февральдә явым-төшем көтелми. Төнге температура -12...-17 градуска кадәр төшәчәк, аязганда -21° га кадәр, көндез -5° дан -10°га кадәр.