Чаллыда балалар мәйданчыгында уйнаган кыз имгәнгәннән соң җинаять эше ачылды
Чаллыда алты яшьлек кыз балалар мәйданчыгында уйнаганда имгәнгәннән соң җинаять эше ачылды. Бу хакта Россия Тикшерү комитетының ТР буенча тикшерү идарәсе җитәкчесенең өлкән ярдәмчесе Андрей Шептицкий хәбәр итте.
Бу хәл 2 мартта Фоменко проспектындагы йорт ишегалдында булган. Кыз мәйданчыкта уйнаганда имгәнгән. Якынча мәгълүматлар нигезендә, бала тауга менгән һәм конструкциядәге ачык урынга төшеп киткән.
Тикшерүчеләр имин булмаган хезмәтләр күрсәтү турындагы маддә нигезендә эш ачкан. Хәзерге вакытта алар бу очракның барлык шартларын тикшерә һәм мәйданчыкның торышы һәм куркынычсызлыгы өчен кем җаваплы булуын ачыклый.