«Беренчеләр хәрәкәте» активистларына югары уку йортларына кергәндә өстәмә балл биреләчәк

Татарстанда «Беренчеләр хәрәкәте» сафларындагы казанышлары өчен чыгарылыш сыйныф укучылары кайбер югары уку йортларына керү өчен өстәмә баллар ала алачак. Бу хакта үзенең Телеграм-каналында ТР Рәисе ярдәмчесе, республикада «Беренчеләр хәрәкәте» җитәкчесе Тимур Сөләйманов хәбәр итте.

«Бүген югары уку йортларына кабул итү кагыйдәләрендә чыгарылыш укучыларын бүләкләүнең төрле механизмнары бар: олимпиадаларда җиңгән, волонтерлык, ГТО тапшырган өчен баллар өстәлә. Без команда белән системалы социаль әһәмиятле инициативаларны гамәлгә ашырган өчен югары уку йортларына кергәндә өстәмә баллар исәпләү буенча проект әзерләдек. Бу бәяләүнең үтә күренмәле һәм объектив системасы булачак, аны якын арада Татарстанда гамәлгә кертәчәкләр», - дип белдерде ул.

Бу инициатива Татарстан Ректорлар Советы тарафыннан хупланды. Сөләйманов тиздән өстәмә баллар бирәчәк югары уку йортлары исемлеге белән уртаклашырга вәгъдә итте.

Хәрәкәтне булдыру турындагы Указны 2022 елның җәендә Россия Президенты Владимир Путин имзалады. «Беренчеләр хәрәкәте» Бөтенроссия оешмасының Татарстан бүлеген республиканың элеккеге Яшьләр министрлыгы башлыгы Тимур Сөләйманов җитәкләде. «Беренчеләр хәрәкәте» белән берлектә эшләячәк Республика Координация советын төзү турындагы указга 2023 елның 14 февралендә Татарстан Рәисе Рөстәм Миңнеханов кул куйды.