«Казан Кремле» музей-тыюлыгы Коръәннең сирәк басмалары белән онлайн күргәзмә әзерләде
«Казан Кремле» музей-тыюлыгы сайтында «Казан Кремле фондларында Казан Коръәннәре» виртуаль күргәзмәсе ачылды. Онлайн экспозиция мөселманнарның изге китабының сирәк басмалары һәм аның Казанда басылу тарихы белән таныштыра, дип хәбәр итә мәдәният учреждениесенең матбугат хезмәте.
Проект музей фондларыннан ун экспонатны үз эченә ала. XIX-XX гасыр басмалары Казан басмаханәләренең үсешен күзәтергә, нәширләр, хәйриячеләр һәм китап хуҗалары турында белергә, шулай ук басма технологияләренең һәм Коръән бизәлешенең ничек үзгәрүен күрергә мөмкинлек бирә.
Казан Коръәнне массакүләм бастыруның беренче шәһәре булып санала, ә җирле басмаханәләр үз вакытында мөселманнарның изге китабын бастыру стандартын куйганнар.
Күргәзмәнең иң иртә экспонаты 1803 елгы «балалар» Коръәне булды. Бердәнбер тиражның бер томы Азия типографиясендә 1 мең данә тираж белән бастырыла.Экспозициядә аерым урынны Казанда шәрыкны өйрәнүче Гордей Саблуковның Коръәнне рус теленә тәрҗемә итүенең беренче нөсхәләренең берсе алып тора.
Иң соң экспонат 1934 елгы. Бу Коръән Токиода эмигрант татарлар тарафыннан мөселман җәмгыятьләре акчасына бастырыла һәм дистә еллар узгач ТР башкаласына кайта.
Виртуаль күргәзмә белән музей-тыюлыкның рәсми сайтында танышырга мөмкин.