Путин унике ел эчендә Кырым үсешенә күпме акча тотылганын әйтте

Ярымутрауның Россия белән кушылуыннан соң узган 12 ел эчендә Кырым һәм Севастополь үсешенә кертемнәр якынча 1,3 трлн сум тәшкил иткән. Бу хакта РФ Президенты Владимир Путин Хөкүмәт әгъзалары белән Федерациянең әлеге ике субъектының социаль-икътисади үсеше мәсьәләләренә багышланган киңәшмәдә хәбәр итте.

«Узган еллар эчендә Кырым һәм Севастополь үсеше өчен күп нәрсә эшләнде. 12 ел дәвамында ярымутрауның өстенлекле социаль-икътисади мәсьәләләрен хәл итүгә якынча 1,3 трлн сум юнәлдерелгән», – дип белдерде Дәүләт Башлыгы, аның сүзләрен Кремль матбугат хезмәте китерә.

Путин сүзләренчә, нәтиҗәдә Кырым ярымутравында Транспорт һәм инженерлык инфраструктурасының, энергия белән тәэмин итү, сәнәгать, мәгариф һәм сәламәтлек саклауның яңа объектлары торгызыла һәм төзелә.

РФ Президенты шулай ук республикада да, федераль әһәмияткә ия шәһәрдә дә дәүләт һәм бизнес катнашында яңа инвестицион проектлар тормышка ашырылуын искәртте. Аның бәяләвенчә, ярымутрау территориясендә төзелгән ирекле икътисадый зона уңышлы эшли, анда инде 1,6 меңнән артык резидент теркәлгән.