Ўзбекистонда инфляцион кутилмалар 11,5% атрофида тўхтади

Декабр ойида Ўзбекистон аҳолисининг яқин 12 ой учун инфляция бўйича кутилмалари 11,5% даражасида ўзгаришсиз қолди. Бизнес вакилларида эса бу кўрсаткич 11,1% гача кўтарилди. Бу рақамлар Марказий банкнинг 2026 йил охирига мўлжалланган инфляция прогнози — тахминан 6,5% —дан анча юқори. Бу ҳақда kursiv.uz хабар беради.

Марказий банк ўтказган сўровларга кўра, бу узоқ вақтдан бери илк бор кутилмалар пасайишдан тўхтаган ой бўлди: аҳоли орасида кутилмалар кетма-кет етти ой давомида тушиб келган, бизнесда эса тўрт ой давомида пасайган эди.

Кутилмалардаги хавотирлар кучайишида асосий омил сифатида коммунал хизматлар нархининг ошиши тилга олинган. Ушбу бандни сўровда қатнашган фуқароларнинг 50%и, тадбиркорларнинг 46%и кўрсатган.

Аҳоли орасида ёқилғи ва энергия нархлари бўйича хавотир кескин ошиб, 47% га етди. Шунингдек, транспорт харажатлари қимматлашиши ҳақидаги кутишлар 29% ни ташкил этди.

Тадбиркорлар орасида ҳам транспорт харажатлари ошиши (37%), ёқилғи ва энергия ресурслари нархининг кўтарилиши (45%) бўйича кутилмалар кучайди. Бундан ташқари, солиқ юкламаси ҳамда иш ҳақи харажатлари ўсиши ҳақидаги хавотирлар ҳам кўпайган.

Энг юқори инфляцион кутилмалар яна Тошкентда қайд этилди: пойтахт аҳолиси инфляцияни 13,5% даражасида кутмоқда, бизнес эса 12,2% ни прогноз қилган. Энг паст кутилмалар Самарқанд вилоятида — 9,7%.

Ижтимоий гуруҳлар кесимида энг пессимист кайфият пенсионерларда кузатилиб, уларнинг кутилмалари 12,9% га тенг бўлган. Энг паст кўрсаткич талабалар орасида қайд этилиб, 9,5% ни ташкил қилган.