Шавкат Мирзиёев Чирчиқда янги жанговор модуллар имкониятлари билан танишди
Шавкат Мирзиёев Чирчиқ шаҳридаги технопаркка ташриф буюриб, мудофаа саноати корхоналари фаолияти билан танишди. Давлат раҳбарига зирҳли техника ҳамда масофадан бошқариладиган жанговор модулларни ишлаб чиқариш жараёнлари намойиш этилди. Бу ҳақда podrobno.uz хабар беради.
Қайд этилишича, янги жанговор модуллар ёмон кўриниш шароитида ҳам ҳаракатдаги ва стационар нишонларни аниқлаш ҳамда яксон этиш имконини беради. Улар автоматлаштирилган бошқарув, барқарорлаштириш, оптик кузатув ва замонавий нишонга олиш тизимлари билан жиҳозланган.
Технопарк мутахассислари ишнинг тўлиқ циклини бажаради: компонентларни йиғишдан тортиб, дастурий таъминотни созлаш, қурол-аслаҳани интеграция қилиш ва полигонда синовдан ўтказишгача. Тайёр модуллар енгил зирҳли техника, махсус автомобиллар, катерлар ва БТРларга ўрнатилмоқда.
Лойиҳа маҳаллий ва хорижий ҳамкорлар билан бирга амалга оширилаётгани ишлаб чиқариш ҳажмини ошириш, янги иш ўринлари яратиш ва миллий технологик базани мустаҳкамлашга хизмат қилиши таъкидланди. Президент масъулларга маҳсулот сифати ва ишончлилигини қатъий назорат қилиш, маҳаллийлаштиришни кенгайтириш ҳамда муҳандислик салоҳиятини ривожлантириш бўйича топшириқлар берди.