Трамп 8 июль куни ўзга сайёраликлар ҳақида баёнот бериши маълум бўлди

АҚШ президенти Доналд Трамп инсониятнинг ўзга сайёраликлар билан алоқалари ҳақида “тарихдаги энг муҳим баёнот”ни эълон қилишни режалаштираётгани ҳақида хабарлар тарқалди. Бу маълумотни ҳужжатли фильмлар режиссёри Марк Кристофер Ли Трамп маъмуриятига яқин бўлган манбага таяниб айтган. Хабар Daily Star нашрида келтирилган.

Лининг таъкидлашича, Трамп бу мавзуда чиқиш матнини олдиндан тайёрлаб қўйган. Инсайдернинг гапига кўра, баёнот эълон қилингач, “инсоният абадий ўзгаради” ва айтиладиган маълумотлар шунчаки тахмин ёки қўрқитиш эмас, балки “мутлақ ҳақиқат” сифатида қабул қилиниши мумкин.

Энг қизиқ жойи — сана масаласи. Манба нутқ учун кун аллақачон танланганини, бу қарор “тасодифий эмас”лигини урғулаган. Гап 2026 йил 8 июль санаси ҳақида кетмоқда. Хабарда бу сана АҚШда бўлиб ўтадиган футбол бўйича жаҳон чемпионати билан боғлангани айтилган.

Шунингдек, Ли 79 йил аввал айнан шу кунда Розуэлл (Роуэлл) воқеаси содир бўлганини эслатади. Ўшанда АҚШ армияси Нью-Мексико штатидаги Розуэлл шаҳри яқинида “учар диск” топилгани ҳақида расман маълумот берган, кейинчалик эса бу баёнот ўзгартирилиб, ҳудуддан СССР ядровий синовларини кузатишда қўлланилган баландлик аэростати қолдиқлари топилгани ҳақидаги версия оммага тақдим этилган.

Натижада, Розуэлл воқеаси атрофида ўнлаб йиллар давомида турли қарашлар ва фитна назариялари яшаб келади. Энди эса айрим манбалар Трамп айнан шу символик санада катта баёнот билан чиқиб, бутун дунё кун тартибини кескин ўзгартиришни кўзлаётганини иддао қилмоқда.

Албатта, ҳозирча бу хабарлар расмий тасдиқ олмаган. Лекин битта нарса аниқ: 8 июль яқинлашган сари ушбу мавзу атрофидаги қизиқиш ҳам, баҳслар ҳам янада қизийди.