Ҳасакада қонли тун: курд кучлари тинч аҳолини ўққа тутдими?
Суриянинг шимоли-шарқида жойлашган Ҳасака вилоятида Сурия Демократик Кучлари (SDK) тинч аҳолига қарши оммавий зўравонликлар содир этганликда айбланмоқда. Бу ҳолат курд тузилмалари билан Дамашқдаги ўтиш даври ҳукумати ўртасида оташкесим эълон қилинганидан кўп ўтмай рўй бергани вазиятни янада кескинлаштирди.
Маҳаллий манбалар ва ижтимоий тармоқларда тарқалган маълумотларга кўра, 18–19 январь кечаси SDK бўлинмалари Ҳасака шаҳрининг асосан араблар истиқомат қиладиган маҳаллалари ҳамда қишлоқ ҳудудларида кенг кўламли рейдлар ўтказган. Айниқса, шаҳарнинг жанубий атрофлари ва Гвейран маҳалласида вазият оғир кечгани айтилмоқда.
Гувоҳларнинг таъкидлашича, амалиётлар бошланишидан олдин электр таъминоти узилган, шундан сўнг уйлар тинтув қилинган ва тинч фуқароларга нисбатан ўқ отиш ҳолатлари кузатилган. Айрим манбалар бундай ҳаракатлар қўрқитиш ва жазолаш мақсадида амалга оширилганини даъво қилмоқда.