Шавкат Мирзиёев Давосда "Тинчлик кенгаши" низомини имзолади
22 январ куни Ўзбекистон президенти Шавкат Мирзиёев Швейцариянинг Давос шаҳрида “Тинчлик кенгаши” низомини имзолаш маросимида иштирок этди. Тадбир АҚШ президенти Доналд Трамп раислигида ўтди.
Маросимда Аргентина, Арманистон, Баҳрайн, Болгария, Индонезия, Иордания, Марокаш, Мўғулистон, Озарбойжон, Парагвай, Покистон, Қатар, Қозоғистон, Саудия Арабистони, Туркия, Венгрия ва бошқа давлатлар раҳбарлари, бош вазирлари ҳамда ташқи ишлар вазирлари қатнашди.
Ташаббуснинг моҳияти ва Ўзбекистон позицияси
Президент матбуот хизмати маълумотида қайд этилишича, “Тинчлик кенгаши”нинг ташкил этилиши Ўзбекистон ташқи сиёсатининг тинчликни мустаҳкамлаш, кўп қиррали ҳамкорликни қўллаб-қувватлашга қаратилган устувор йўналишларига мос келади.
Маълум қилинишича, янги тузилма БМТ Хавфсизлик Кенгаши резолюцияси билан қўллаб-қувватланган Ғазо секторидаги можарони тугатиш бўйича комплекс режани амалга ошириш доирасида шакллантирилмоқда.
Ғазо учун режа ва “Янги Ғазо” ғояси
Хабарда таъкидланишича, “Тинчлик кенгаши” можаронинг кескинлашув хавфини пасайтириш, Ғазо секторида иқтисодий ва ижтимоий тикланиш учун қулай шароитлар яратишга қаратилган.
Бу, ўз навбатида, фаровон иқтисодиёт ва тинч-осойишта ҳаётга таянган “Янги Ғазо”ни барпо этиш, истиқболда эса Фаластин давлатини тузиш имкониятини кенгайтириши мумкинлиги қайд этилган.
Ўзбекистон таъсисчи давлатлар сафида
Маълумотга кўра, кенгаш таркибига дунёнинг турли ҳудудларидан нуфузли ва таъсирга эга етакчилар кирган. Низом имзоланиши билан Ўзбекистон “Тинчлик кенгаши”ни таъсис этган давлатлардан бирига айланди.
Президент матбуот хизмати баёнотида бу қадам мамлакатимизнинг кенгаш фаолиятида изчил иштирок этишга, таъсисчи давлатлар ҳамда халқаро шериклар билан яқин ҳамкорликда унинг ваколатларини амалда рўёбга чиқаришга тайёр эканини англатиши таъкидланади.