Самарқандда қотил ёллаш режаси фош этилди: буюртмачи ушланди

Самарқанд вилоятида оғир жиноятнинг олди ўз вақтида олинди. Вилоят ИИБ ахборот хизмати маълум қилишича, ҳуқуқ-тартибот идоралари ҳамкорликда ўтказган тезкор чора-тадбирлар натижасида ёлланма қотилликка буюртма беришга уриниш фош этилган.

Маълумотларга кўра, 2002 йилда туғилган эркак Тошкент шаҳрида яшовчи танишини йўқ қилиш мақсадида ёлланма қотил қидираётгани ҳақида тезкор ахборот келиб тушган. Шу заҳоти Давлат хавфсизлик хизмати Самарқанд вилояти бошқармаси, вилоят ИИБ ҳамда прокуратура ходимлари биргаликда вазиятни назоратга олиб, махсус режа асосида тезкор тадбирга киришган.

Тадбир доирасида шартли “ёлланма қотил” жалб қилинган. Қайд этилишича, 24 ёшли буюртмачи ўзида келишмовчилик бор шахсни ўлдиришни топшириб, бунинг эвазига 2 200 доллар тўлашини айтган.

27 январ куни Самарқанд шаҳрида ўтказилган тезкор тадбир пайтида буюртмачи шартли ёлланма қотилдан грим қилинган “мурда” фотосуратни қабул қилиб олган ва келишилган пулнинг асосий қисмини — 2 000 долларни топширган вақтда ашёвий далиллар билан қўлга олинган. Яъни, жиноят амалга оширилмаган, лекин унга тайёргарлик жараёни аниқ ҳужжатлаштирилган.

Тезкор суриштирув ҳаракатлари давомида яна бир шахсга доир муҳим ҳолатлар ҳам аниқланган. Маълум бўлишича, қўлга олинган буюртмачи ўзи ишлаб келаётган МЧЖнинг 30 ёшли раҳбари билан боғлиқ масала сабаб бу ишга қўл урган. Тергов маълумотларига кўра, раҳбар Тошкент шаҳрида яшовчи қариндоши билан олдиндан мавжуд низолари ҳамда катта миқдордаги қарз масаласи ортидан қотил ёллашга буюртма берган бўлиши мумкин. Мазкур шахс ҳам ушланган.

Ҳозирда ҳолат юзасидан Жиноят кодексининг 25, 97-моддаси (қасддан одам ўлдиришга суиқасд қилиш) 2-қисми билан жиноят иши қўзғатилган. Тергов ҳаракатлари давом этмоқда.

Бундай ҳолатлар бир нарсани қаттиқ эслатади: “муаммони зўравонлик билан ҳал қиламан” деган фикр — энг хатарли йўл. Ҳуқуқни муҳофаза қилувчи идораларнинг тезкор ҳаракати эса бу сафар фожианинг олдини олди.