Садир Жапаров укаси ва ўғлининг ҳалок бўлиш сабабларини очиқлади

Қўшни Қирғизистонда йўллардаги фожиалар яна бир бор қаттиқ гапирилди. Президент Садир Жапаров сўнгги 10 йилдаги ЙТҲлар бўйича жуда оғир рақамларни очиқлади: бу даврда 9 120 киши ҳалок бўлган, яна 13 260 киши турли жароҳатлар олган. Энг аламлиси — жароҳат олганларнинг салмоқли қисми кейинчалик ногиронликкача етиб бораётгани, бу эса давлат зиммасига нафақа ва ижтимоий қўллаб-қувватлаш каби қўшимча юк тушираётганини таъкидлади.

Президент буни “қуруқ статистика” сифатида эмас, ҳаётдаги оғриқли воқелик сифатида айтди. Унинг сўзларига кўра, укаси ва унинг рафиқаси автоҳалокатда воқеа жойида ҳалок бўлган. Уларнинг тўрт нафар фарзанди эса турли даражадаги жароҳатлар олган бўлса-да, омон қолган.

Шунингдек, Жапаров 2019 йилда катта ўғли ҳам ЙТҲ оқибатида ҳаётдан кўз юмганини эслади. Очиқ манбаларда келтирилишича, 27 ёшли Дастан 2019 йил август ойида Бишкекда мотоцикл бошқариб кетаётган вақтда автомобил билан тўқнашган, оғир жароҳатлардан сўнг шифохонада вафот этган.

«Уларнинг тўрт нафар фарзанди турли даражадаги жароҳатлар олган бўлса-да, омон қолишди. 2019 йилда катта ўғлим ЙТҲ оқибатида ҳалок бўлди. Бу каби фожиаларга минглаб одамлар дуч келмоқда», — деди Садир Жапаров.

Бу гапларнинг тагида битта қаттиқ ҳақиқат бор: рулда “менга ҳеч нарса бўлмайди” деган кайфиятнинг нархи жуда қиммат. Президентнинг чақируви ҳам шу — ЙҲҚ қоидаларини чуқур ўрганиш, йўл маданиятини кучайтириш ва назоратни реал натижа берадиган даражага олиб чиқиш.

Келажак учун хулоса оддий, лекин қаттиқ: йўл хавфсизлиги — фақат жарима ёки камера масаласи эмас, бу ҳар куни минглаб оилалар тақдири. Ҳар ким ўзидан бошласа — тезлик, масофа, телефон, хавфли манёврлар — шуларнинг ўзиёқ эртанги кун статистикасини енгиллатади. “Йўл кечиради” деган афсона йўқ — йўл ҳисоб-китоб қилади.