Саккиз давлатда 89 қизга жинсий зўравонлик қилган шахс ушланди

Францияда саккиз мамлакат ҳудудида 89 нафар вояга етмаган қизга нисбатан жинсий зўравонлик содир этганликда гумонланаётган эркакка нисбатан жиноий иш қўзғатилди. Бу ҳақда Le Figaro нашри хабар берди.

Маълум қилинишича, у қарийб 50 йилдан ортиқ вақт давомида — 1967 йилдан 2022 йилгача — жинсий жиноятлар содир этган. Гумонланувчи Франция, Жазоир, Швейцария, Германия, Нигер ҳамда яна бир қатор давлатларда яшаб, ўқитувчи ёки ёшлар оромгоҳлари раҳбари сифатида вақтинчалик ишларда фаолият юритган.

Прокуратура маълумотига кўра, иш юзасидан тергов 2024 йил январь ойида Гренобль шаҳрида бошланган. Тергов давомида 13 ёшдан 17 ёшгача бўлган ўсмирлардан иборат жабрланувчилар рўйхати шакллантирилган.

Ҳозирда ишда 89 нафар жабрланувчи қайд этилган бўлиб, уларнинг тахминан 40 нафари аниқланган. Қурбонларнинг кўпчилиги шикоят билан мурожаат қилган, бироқ ҳозирча ҳеч бири расман даъвогар сифатида чиқмаган.

Прокуратура рўйхат тўлиқ эмаслиги мумкинлигини билдириб, жабрланувчилар сони янада кўпроқ бўлиши эҳтимолини истисно этмади. Тергов раҳбари Манто жабрланувчиларни имкони борича тезроқ гувоҳлик беришга чақирган.

Шу билан бирга, прокурор 1993 йилгача содир этилган жиноятлар бўйича даъво муддати ўтиб кетганини эслатди. Бироқ жабрланувчилар терговга воқеаларни аниқлаш ва умумий манзарани тиклаш учун маълумот беришлари муҳим эканини таъкидлади.

Тергов жараёнида ушбу шахсга нисбатан яна икки нафар инсон ўлими билан боғлиқ ҳолатлар ҳам ўрганилмоқда. У 1974 йилда саратон касаллигига чалинган онасини, 1992 йилда эса 90 ёшли аммасини ёстиқ билан бўғиб ўлдирганини тан олган.