Зебо Раҳимова илк совчи 12 ёшида келганини,муносиб йигит ҳақида талабларини айтди

Блогер Зебо Раҳимова интервьюлардан бирида шахсий ҳаёти ва турмуш қуришга оид фикрлари билан ўртоқлашди. Унинг айтишича, илк совчи 12 ёшидаёқ келган.

Зебо 18 ёшида ҳам бир йигит томонидан совчи қўйилганини эслади. Унинг таъкидлашича, йигитнинг оиласи жуда яхши таассурот қолдирган, аммо йигитнинг ўзи кутилгандек чиқмаган.

“Бизга умуман тўғри келмайдиган инсон экан”, дейди блогер. Шу воқеадан сўнг ота-онаси ўзларини айбдор ҳис қилгани ва авваллари турмуш ўртоғини ўзлари танлаб беришмоқчи бўлганини айтди.

Зебонинг сўзларига кўра, у вақтларда “кимни муносиб деб топсак, шунга турмушга чиқасан” дейишган. У эса бу фикрга қарши чиқмаган, чунки кимнидир севиб қолишини тасаввур қилмаганини билдирган.

Кейинчалик ота-онаси қарорни унинг ўзига қолдирган. “Қандай йигит бўлиши керак?” деган саволга жавобан Зебо аниқ режа қилмаганини, аммо унга керакли фазилатлар мавжуд бўлса, ўша инсон билан турмуш қуриши мумкинлигини айтди.

Шунингдек, блогер танланган инсонни албатта яхши кўриш кераклигини таъкидлади. Унинг фикрича, муносабатларда меҳр ва ўзаро тушуниш энг муҳим омил ҳисобланади.