Марҳум ЙПХ инспектори "Жасорат" медалига лойиқ кўрилди

Президент Шавкат Мирзиёев имзолаган фармонга биноан Тошкент шаҳар ИИББ Йўл ҳаракати хавфсизлиги бошқармасига қарашли йўл-патруль хизмати инспектори, марҳум кичик сержант Ҳосилбек Эшназаров "Жасорат" медали билан мукофотланди.

Расмий ҳужжатда у ички ишлар тизимидаги сидқидилдан меҳнати, жиноятчиликка қарши курашдаги фаол иштироки ҳамда жамоат хавфсизлигини таъминлаш йўлидаги хизматлари учун муносиб тақдирлангани қайд этилган. Шунингдек, йўлларда ҳаракат хавфсизлигини мустаҳкамлаш, ЙТҲларнинг олдини олиш ва қоидабузарликларнинг профилактикасини самарали ташкил этишга қўшган ҳиссаси алоҳида эътироф этилган.

Эслатиб ўтиш жоиз, 25 февраль куни соат 21:48 ларда Тошкент шаҳрида хизмат вазифасини бажараётган пайтда Ҳосилбек Эшназаровни "BMW" русумли автомашина уриб юборган. Тезкор маълумотларга кўра, транспорт воситасини 10-синфда ўқийдиган, вояга етмаган шахс бошқарган.

Оғир жароҳат олган инспектор уч кун мобайнида шифокорлар назоратида даволанган, аммо кўрилган тиббий чораларга қарамасдан ҳаётдан кўз юмган. Маълумотларга кўра, Ҳосилбек Эшназаров 2022 йилдан буён ички ишлар органларида хизмат қилиб келган. Унинг ортидан ота-онаси, рафиқаси, икки нафар ўғли ва бир нафар қизи қолган.