Қуёш панеллари ўрнини босувчи янги технология яратилди

Сингапур Миллий университети тадқиқотчилари атроф-муҳитдаги ҳаво ва иссиқликдан фойдаланиб, туну кун электр энергияси ишлаб чиқарадиган янги қурилмани яратишди. Ушбу ихтиро анъанавий қуёш панелларига муқобил сифатида кўрилмоқда ва келажакда уй хўжаликларининг электр энергияси учун тўлайдиган харажатларини сезиларли даражада қисқартириши кутилмоқда. Бу ҳақда unian.net хабар беради.

Мутахассислар томонидан ишлаб чиқилган мазкур қурилма қалинлиги атиги 0,3 миллиметр бўлган мато асосидаги технологиядир. У ҳаводаги намлик ва иссиқликни ютиб, электр энергиясига айлантириш хусусиятига эга. Синовлар давомида қурилма 150 соатдан ортиқ вақт давомида 0,7 волт кучланиш ҳосил қилишга муваффақ бўлди. Қурилманинг асосий таркибий қисми гигроскопик ионли гидрогель ҳисобланади. Ҳозирда технология синов босқичида бўлса-да, у энергетика соҳасида катта ўзгаришлар ясаши мумкин.

Шу билан бирга, энергетика бозорида муқобил ечимлар кўпайиб бормоқда. Масалан, Канаданинг "Ауреа Течнологиес" стартапи томонидан ишлаб чиқилган "Шине 2.0" портатив шамол турбинаси ҳам эътиборга лойиқ. У ихчам ўлчамга эга бўлиб, рюкзакка бемалол сиғади. Ушбу турбина кучсиз шамол ёрдамида 50 ваттгача қувват ишлаб чиқаради ва ўзининг ички батареясида энергияни сақлаб қолади. Бу каби инновациялар келажакда энергия таъминотини янада қулай ва арзон қилишга хизмат қилади.