48 ёшли аёл 13-фарзандини дунёга келтирди

Қозоғистоннинг Темиртау шаҳрида истиқомат қилувчи 48 ёшли аёл 13-фарзандини дунёга келтирди. Бу ҳақда “Nur.kz” нашри хабар тарқатди.

Маълум қилинишича, жорий йилнинг 2 март куни Лариса Кузнецова вилоят клиник шифохонасининг 1-сонли перинатал марказида ўғил фарзандли бўлган. Чақалоқ 3650 грамм вазн ва 54 сантиметр бўй билан туғилган. Туғруқ табиий усулда кечган бўлиб, айни пайтда она ва боланинг аҳволи яхши экани айтилмоқда.

Янги туғилган Эмин оиладаги 13-фарзанд бўлди. У Ларисанинг тўққизинчи ўғли ҳисобланади. Аёлнинг энг катта қизи эса ҳозир 25 ёшда.

Ларисанинг сўзларига кўра, у ўзи ҳам катта оилада вояга етган. Турмуш ўртоғи эса ёлғиз фарзанд бўлиб улғайганига қарамай, вақт ўтиши билан катта оила муҳитига мослашиб кетган. Шунингдек, у фарзандининг соғ-саломат туғилишида ёрдам кўрсатган шифокорларга алоҳида миннатдорлик билдирган.