Тошкент ҳокимлиги кучли шамол ва ёғингарчиликдан огоҳлантирди

Тошкент шаҳар ҳокимлиги матбуот хизмати пойтахт аҳолиси ва меҳмонларини бугун кузатилаётган ноқулай об-ҳаво шароити юзасидан огоҳлантирди. Шаҳарда кучли шамол ва ёғингарчилик бўлаётгани сабабли фуқаролардан эҳтиёткорлик чораларини кўриш сўралмоқда.

Мутасаддиларнинг таъкидлашича, бундай об-ҳаво шароитида электр узатиш симларининг узилиши ҳамда дарахтларнинг қулаши каби хавфли ҳолатлар юзага келиши мумкин. Шу боис, автомобиль эгаларига ўз транспорт воситаларини дарахтлар ва электр тармоқлари остида қолдирмаслик қатъий тавсия этилади.

Шунингдек, шаҳар кўчаларида ҳаракатланиш вақтида хавфсизлик қоидаларига риоя қилиш, ўзингиз ва яқинларингиз ҳаётини ҳамда шахсий мулкингизни асраш муҳимлиги эслатиб ўтилди. Ҳозирги вақтда барча тегишли коммунал ва қутқарув хизматлари тўлиқ шай ҳолатга келтирилган бўлиб, юзага келиши мумкин бўлган муаммоларни тезкорлик билан бартараф этишга тайёр.

Агар қандайдир фавқулодда вазият юз берса, фуқаролар зудлик билан 112, 1055 қисқа рақамларига ёки 71 212 69 80, 71 212 69 82 телефон рақамлари орқали масъул хизматларга мурожаат қилишлари сўралади.