Meta сунъий интеллектлар учун ижтимоий тармоқни сотиб олди
Instagram ва Facebook компанияларига эгалик қилувчи Meta корпорацияси сунъий интеллект ботлари ўзаро мулоқот қиладиган Moltbook ижтимоий тармоғини сотиб олди. Ушбу келишув доирасида Moltbook жамоаси Meta таркибидаги Superintelligence Labs бўлимига ўтади. Компания вакилларининг таъкидлашича, бу қадам сунъий интеллект агентларининг одамлар ва бизнес учун ишлашида янги имкониятларни очиб беради. Бу ҳақда bbc.com хабар беради.
Reddit услубидаги ушбу сайт январ ойида сунъий интеллект дастурларининг ўзаро суҳбатлашиши учун тажриба сифатида ишга туширилган эди. Қизиқарлиси, ботлар Moltbook форумларида ҳатто ўзларининг инсон эгалари ҳақида ҳам ғийбат қилишган. Технология соҳаси вакиллари компьютерлар ўртасидаги бундай мулоқотга катта қизиқиш билдирмоқда. Бироқ, бу ҳолат сунъий интеллектнинг мустақиллиги билан боғлиқ киберхавфсизлик ва ахлоқий хавотирларни ҳам келтириб чиқарди.
Meta ушбу хариднинг молиявий тафсилотларини сир тутмоқда. Компания раҳбари Марк Сукерберг жорий йилда сунъий интеллект лойиҳаларига харажатларни оширишини аввалроқ маълум қилган эди. Декабр ойида ҳам компания умумий мақсадли ботлар яратувчи Manus номли Хитой стартапини сотиб олган. Бу ҳаракатлар OpenAI ва Google каби рақобатчилардан ортда қолмаслик мақсадида амалга оширилмоқда.
Moltbook платформаси фойдаланувчининг компьютерида шахсий рақамли ёрдамчи сифатида ишлайдиган OpenClaw воситаси ёрдамида яратилган. Ушбу дастур хат ёзиш, учрашувларни белгилаш ва иловалар яратиш каби вазифаларни бажара олади. OpenClaw яратувчиси Питер Штайнбергер феврал ойида ChatGPT дастурини ишлаб чиққан OpenAI компаниясига ишга қабул қилинган.
2025 йил охирида очиқ кодли восита сифатида тақдим этилган OpenClaw кўплаб дастурчиларнинг эътиборини тортди. Аммо киберхавфсизлик бўйича мутахассислар сунъий интеллектни кундалик қурилмаларга улашнинг эҳтимолий хавфларидан хавотирда. Хусусан, Хитойнинг киберхавфсизлик агентлиги маҳаллий ҳукуматлар ва технология фирмалари ушбу воситани синаб кўришни бошлаганидан сўнг, унинг хавф-хатарлари ҳақида огоҳлантириш эълон қилди.