Эроннинг раҳбари Можтаба Хоманаийнинг соғлиги ҳақида маълумот берилди
Эроннинг олий раҳбари Можтаба Хоманаий “барқарор соғлиқда” ва “вазиятни тўлиқ кузатиб турибди”, — дея маълум қилди Эрон ташқи ишлар вазири Аббос Ароқчий.
Можтаба Хоманаий 8 март куни лавозимга тайинланганидан буён омма олдида кўринмаган. 12 март куни унинг халққа йўллаган илк мурожаати матни Эрон давлат телевиденияси диктори томонидан ўқиб эшиттирилди.
Аввалроқ АҚШ президенти Дональд Трамп Эроннинг янги олий раҳбари ҳали тирик эканига шубҳа билдирган эди. Айрим хабарларга кўра, Хоманаий унинг отаси — аятолла Али Хоманаий ва оила аъзолари ҳалок бўлган ҳужум пайтида жароҳатланган бўлиши мумкин. Аммо бу маълумотлар ҳали тасдиқланмаган.
Жума куни АҚШ мудофаа вазири Пит Хегсет Можтаба Хоманаий “яраланган ва эҳтимол оғир жароҳат олган” бўлиши мумкинлигини айтган.