Эрон Олий раҳбари АҚШ таклифини кескин рад этди
Reuters агентлиги тарқатган маълумотга кўра, Мужтабо Хоманаий АҚШ томонидан можарони юмшатиш ёки тинчликка эришишга қаратилган таклифларни қабул қилмади.
Манба таъкидлашича, Эронга ушбу таклиф икки воситачи давлат орқали етказилган. Исми очиқланмаган эронлик расмий манбанинг билдиришича, ушбу ташаббус АҚШ билан кескинликни пасайтириш ёки музокараларни бошлаш имкониятини ўз ичига олган.
Агентлик маълумотига кўра, ташқи сиёсатга бағишланган дастлабки учрашувлардан бирида Мужтабо Хоманаийнинг АҚШ ва Исроилга нисбатан позицияси “жуда қатъий ва жиддий” экани алоҳида қайд этилган.
Шу билан бирга, мазкур учрашувда Хоманаий шахсан иштирок этган-этмагани ҳақида аниқ маълумот берилмаган.
Reuters қайд этишича, воситачилар орқали юборилган таклиф Эрон ва АҚШ ўртасидаги зиддиятни юмшатиш ҳамда эҳтимолий келишув вариантларини муҳокама қилишга қаратилган эди.