Эрон Натанзга янги ҳужум бўлганини билдирди

Эрон Атом энергияси ташкилотига кўра, Эрон 21 март куни АҚШ ва Исроил Натанздаги уранни бойитиш мажмуасига янги зарба берганини билдирди. АҚШ ва Исроил расмийлари бу даъвога дарҳол изоҳ бермади. Эрон расмийлари техник текширув радиоактив моддалар сизиб чиқмаганини ва объект яқинида яшовчи одамлар учун хавф йўқлигини аниқлаганини айтди. Бу ҳақда Dw.com хабар беради.

Эроннинг ядро агентлиги зарбани халқаро ҳуқуқ ва мажбуриятлар, жумладан Ядро қуролини тарқатмаслик тўғрисидаги шартномани бузиш деб атади. Теҳрон ҳужум ҳақида Халқаро атом энергияси агентлигини хабардор қилганини билдирди. МАГАТЭ объект ташқарисида радиация даражаси ошгани аниқланмаганини ва ҳисоботни кўриб чиқаетганини маълум қилди.

Исфаҳон вилоятида, Теҳрондан қарийб 250 километр жанубда жойлашган Натанз мажмуаси Эроннинг энг машҳур ядро объектидир. У ер усти ва ер остидаги бойитиш иншоотлари ҳамда 10 мингдан ортиқ сентрифугани ўз ичига олади. МАГАТЭ аввалроқ Натанздаги уран 60 фоизгача бойитилганини айтган эди, бу одатда атом энергетикаси учун керак бўладиган 3-5 фоиздан анча юқори, аммо барибир қурол даражасидаги материал билан боғланадиган тахминан 90 фоиздан пастдир.

Объект 2025 йил ёзида АҚШ зарбалари чоғида ҳам нишонга олинган эди, ўшанда ер устидаги сентрифугалар йўқ қилингани хабар қилинган. Ўша пайтда ер ости қисмлари зарарланган-зарарланмагани ноаниқ бўлиб қолган эди. Сўнгги хабар қилинган ҳужум феврал охиридан бери кенгайиб бораётган минтақавий можаро фонида юз берди, бу можарода Эрон ва унинг рақиблари Яқин Шарқ бўйлаб ўзаро зарбалар алмашмоқда.