“Мени менсимайди дейишади, аслида эса…” — Нодира Маҳмудова очиқ гапирди

Ўзбекистонда хизмат кўрсатган артист Нодира Маҳмудова “Ўзимизнинг гап” кўрсатувида берган интервюсида ўзи ҳақидаги турли қарашларга муносабат билдирди.

Санъаткорнинг айтишича, кўпчилик уни ташқи кўринишидан келиб чиқиб виқорли, ўзини катта тутадиган, ҳатто бироз менсимайдиган инсон деб ўйлайди. Бироқ у бундай таассурот атайлаб қилинмаслигини алоҳида таъкидлади.

“Бу бизнинг генимизда бор. Биз буни атайлаб қилмаймиз. Онам ва оиламиздаги беш нафар қиз — ҳаммамиз шундаймиз. Бизнинг оилада ҳамма қизларнинг бўйи узун, фақат мен бироз пастроқман. Скелет тузилишимиз, бўйнимизни тутишимиз, бошимизнинг ҳолати — барчаси туғма. Буни сунъий тарзда қилиш қийин, бунинг учун йиллар керак бўлиши мумкин,” — дейди у.

Актрисанинг сўзларига кўра, бу каби фикрлар ҳатто онасига нисбатан ҳам кўп билдирилган. Унинг ўзи ҳам кўпинча “бу қизга яқинлашиб бўлмайди”, “жуда ўзини катта олади” каби гапларни эшитганини таъкидлади.

Шунга қарамай, Нодира Маҳмудова аслида жуда содда ва очиқкўнгил инсонлар эканлигини айтади:

“Биз билан гаплашган одам бемалол суҳбатлашиб кетаверади. Жуда соддамиз, очиқмиз, ҳамма билан тез чиқишиб кетамиз.”

У яна бир одатини ҳам очиқлади. Унинг айтишича, кўчада юрганда атрофдагиларга унчалик эътибор бермайди. Шу сабабли айрим танишлари сўрашмагани учун хафа бўлишган.

“Аслида эса мен уларни пайқамайман. Мени билган инсонлар ўзлари келиб сўрашиб кетаверади. Ҳатто баъзида узоқ суҳбатдан кейин ҳам суҳбатдошим қандай зирак таққанини айтиб бера олмайман. Чунки майда деталларга эътибор бермайман,” — дея самимий фикр билдирди санъаткор.