Мустақилликнинг 35 йиллигини кенг нишонлашга тайёргарлик бошланди
Ўзбекистонда давлат мустақиллигининг 35 йиллигини муносиб нишонлашга қаратилган муҳим қарор қабул қилинди. Унга мувофиқ, ушбу санага тайёргарлик кўриш ва байрам тадбирларини юқори савияда ташкил этиш учун республика комиссияси таркиби тасдиқланди.
Қайд этилишича, комиссия мустақиллик байрамини Қорақалпоғистон Республикаси, Тошкент шаҳри, барча вилоятлар, туман ва шаҳарларда, шунингдек, маҳалла, қишлоқ ва овулларда кенг қамровда ўтказишни таъминлайди. Шу мақсадда концепция асосида аниқ чора-тадбирлар режаси ишлаб чиқилиб, унинг изчил ижроси йўлга қўйилади.
Бундан ташқари, илм-фан, таълим, маданият ва санъат вакиллари, спортчилар ҳамда жамоатчилик фаолларидан иборат ижодий гуруҳлар шакллантирилади. Улар иштирокида апрель ойидан сентябрга қадар бутун республика бўйлаб «Мустақиллик тўйи» номли кенг кўламли маънавий-маърифий тадбирлар, фестиваллар ва ижтимоий лойиҳалар амалга оширилади.
Яна бир муҳим янгилик — миллий мустақиллик ғояларини ўзида мужассам этган «Ватан фидойилари» рамзий монументи яратилади. Бу лойиҳа Бадиий академия, Маданият вазирлиги, Ёзувчилар уюшмаси ҳамда Республика Маънавият ва маърифат маркази томонидан ишлаб чиқилиб, 2026 йил 1 июнга қадар Вазирлар Маҳкамасига тақдим этилади. Кейинчалик мазкур монумент мамлакат бўйлаб барпо этиладиган умуммиллий бирдамлик боғларининг марказий қисмига ўрнатилади.
Шу билан бирга, 2026 йил 1 августга қадар «Мустақиллик зафарномаси» номли махсус китоб-альбом тайёрланади. Унда мамлакатда турли соҳаларда амалга оширилган ислоҳотлар, қўлга киритилган ютуқлар ва тараққиёт натижалари ёритилади.
Август ойида эса Тошкент шаҳрида «Мустақил Ўзбекистон – 35 йиллик тараққиёт йўли: ислоҳотлар, натижалар ва истиқболлар» мавзусида халқаро илмий-амалий конференция ўтказилиши режалаштирилган.
Шунингдек, 1 сентябрга қадар «Мустақилликнинг 35 йиллиги»га бағишланган эсдалик олтин тангаси ҳам зарб этилади.
Кўриниб турибдики, бу сана оддий байрам эмас — у бутун мамлакат учун катта аҳамиятга эга бўлган тарихий босқич. Демак, бу йилги мустақиллик байрами нафақат тантана, балки келажакка ишончни янада мустаҳкамлайдиган муҳим воқеага айланади.