Темниковасо явить мель оска марто налксемань спортонтень (эрзя)

«Арзамас-Дивеево-Саров» паломникень-туристэнь регионъютконь кластерэнь кастомань вейке ёнсокс карми оскасо налксеманть кастомась. Темниковасо рузонь раськень спортонтень мель явить кезэрень шкасто саезь ды те шкас.
Те мельс туиця оска ды дёкопалка марто кавто командатненень юрка налксема, кона юты прямоугольной куросо.
Оскасо налксемась Темниковасо теевсь аволь ансяк куронь налксемакс. Таркань командатне ардтнесть спортонь те видэнть коряс первенстватнес Сочи, Анапа ды Россиянь лия оштнес, ды аволь весть теевкшнесть изницякс. Те Николай Березинэнь Темниковань 2-це номер школань физкультурань тонавтыцянь теевксэсь. Тонавтыцянтень а кода ульнесь нолдамс, штобу од ломантне стувтовлизь тетянь ды покштянь вечкевикс налксеманть.
«Школань прявттнэнь ды тетятнень-аватнень пельде лезксэнь алтазь, сон васня совавтызе оскасо налксеманть физкультурань тонавксонь лувонтень теке анокстамонь пелькс, а седе тов эйкакштне кармасть эйсэнзэ налксеме тонавкстнэсэяк», — ледстни Темниковань спортонь школань тренерэсь Николай Болдин.
Неень шкасто Темниковась видекс теевсь оскасо налксемань тонавтомань федеральной куншкакурокс. Тейтертне уш колмоксть теевкшнесть те налксемань коряс Россиянь изницякс. Тонавкстнэ ютыть физкультурань-шумбрачинь витемань комплекссэ. Ней командась аноксты Краснодаронь буесэ коень пелькстамос. Лембе пертьпельксэнь самонзо марто анокстамотне ютавтовить човартаркас. Мокша леенть чиресэ, косо уш кото иень перть ютавтовить човаронь пильгеоскань коряс республикань пелькстамотне, арсеви теемс весементь профессиональной чемпионтнэнь анокстамга ды оскало налксемантень тонавтомга.
«Тесэ анокстави куро, стявтови административень кудо ды ванномань таркат», — ёвтнесь Николай Болдин.
Ледстясынек, рузонь оскасо налксемань историясь ушодовсь пек умок. Теде ледстнематне вастневить кезэрень сёрмадовкстнэсэ, а налксемас кедьёнкстнэнь археологтне муизь Великий Новгород ошсо, кандовить 14-це пингентень.