Свердловск министры: Хатын-кыз башта бала табу, аннары гына карьера турында уйларга тиеш

Свердловск өлкәсенең икътисад һәм территориаль үсеш министры Руслан Садыйков төбәк телевидениесенә биргән интервьюсында җәмгыятьтә хатын-кызларның роле турында сөйли. «Хатын-кызлар иң беренче чиратта гендер роле, ягъни бала табу турында уйларга тиеш, ә аннары гына һөнәри үсеш турында», – дип белдерә ул.

Фото: © видеодан скриншот

Министр фикеренчә, күп балалы гаиләләрнең саны арту – уңай тенденция һәм моны сакларга кирәк.

«Әлбәттә, иң төп ячейка — гаилә. Төп гендер рольләре: хатын-кызлар бала табарга тиеш, ирләр гаиләне тәэмин итәргә тиеш...» – ди ул.

Шул ук вакытта ул хатын-кызның ана буларак кына түгел, ә белгеч буларак үсә алу мөмкинлеген дә кире какмый. «Бүгенге көндә бары ир-атлар һәм хатын-кызлар һөнәрләре генә булып саналганнары юк. Безнең төбәктә мөмкинлекләр бик күп. Ләкин без демографиягә кайтсак, башта – гендер ролләре, аннары гына профессиональ роль турында уйларга кирәк. Хәтта болар бер-берсенә комачауламаса да. Хатын-кызлар берлегенә генә карагыз. Күп балалы хатын-кызлар уңышлы бизнес та төзиләр», – диде министр.