Казне Саратовань ёнксонь эрзятненень (эрзя)

Мордовиянь книгань нолдамонь тарканть течи содавтызе Валентина Кривошеева Саратовань региононь общественной организациянь Мордовиянь раськень-культурань «Шумбрат» куншкакуронь прявтось. Раиса Акашкина инженть туртов ютавтсь содавтома, ёвтнесь издательствань тевтнеде, кодамо теварсевкс лангсо неень шкасто важоди. «Шумбрат» Куншкакуронтень Раиса Ивановна казсь рузонь, эрзянь ды мокшонь кельсэ книгат. «Саратовань ёнксонтень неть книгатне пек эрявить», — тешкстызе Валентина Ивановна.
Секс мекс «Шумбрат» эрзянь ды мокшонь раськень-культурань куронть маласо шкасто тевтнень ютксо нолдамс Петровской буень Оркина велень школасо тонавтницятнь туртов эрзянь келень коряс факультатив. Те велесэнть 300 иеде ламо эрить эрзят. Эрзянь раськень эйкакштнеде велесэнть малав 50, ды сынст ули покш мелест тонавтнемс тиринь келенть, содамс эрзятнень ды мокшотнень историянть ды культуранть. А издательстванть пельде казезь книгатне эйкакштненень кармить паро лездамопелекс .