ԱՄՆ-ն ձգտում է առեւտրային ուղի բացել Ադրբեջանի եւ Հայաստանի տարածքով
Ինչպես հաղորդում է ՏԱՍՍ-ը, ելույթ ունենալով ԱՄՆ Սենատի արտաքին հարաբերությունների հանձնաժողովում, Ջեյմս Օ'Բրայենը ողջունել է Հայաստանի վարչապետ Նիկոլ Փաշինյանի «Ռուսաստանից կտրվելու խիզախ քայլերը»։
Մեկնաբանելով Լեռնային Ղարաբաղի շուրջ ստեղծված իրավիճակը՝ ԱՄՆ պետքարտուղարի օգնականն ասել է. «Դա հանգեցրել է լուրջ խզման. Հայաստանի բնակչության զգալի մասը ցանկանում է հեռանալ Ռուսաստանից»։
«Ուստի մենք պայմաններ ենք ստեղծում, որպեսզի դա տեղի ունենա», - Օ'Բրայենի խոսքերը մեջբերում է ՏԱՍՍ-ը:
Խոսելով Հայաստանի եւ Ադրբեջանի միջեւ բանակցությունների մասին՝ Օ՛Բրայենը նշել է, որ Ռուսաստանը «ձգտում է, որ իրադարձությունները զարգանան իր պայմաններով», ինչը, ըստ նրա, «նյարդայնացնում է երկու կողմերին»։
Նա նշել է, որ ԱՄՆ պետքարտուղար Էնթոնի Բլինքենի, Եվրահանձնաժողովի ղեկավար Ուրսուլա ֆոն դեր Լայենի եւ Հայաստանի վարչապետ Նիկոլ Փաշինյանի ապրիլյան հանդիպման ժամանակ «ստեղծվել է նոր հարթակ՝ օգնելու Հայաստանին նվազեցնել իր կախվածությունը Ռուսաստանից»։
«Հայաստանը տնտեսապես եւ էներգետիկ առումով գրեթե ամբողջությամբ կախված է Ռուսաստանից, եւ մենք պետք է դիվերսիֆիկացիայի հասնենք»,- ասել է ամերիկացի դիվանագետը։