Газинур Фәйзуллин йөрәк ярасы турында: «Әтине беренче тапкыр 30 яшемдә күрдем»

Популяр алып баручы Газинур Фәйзуллин, туган авылына кайтып, якыннарының каберләрен зиярәт кылып йөргән. Балачагын искә төшереп, хатирәләргә бирелгән, гомерлек йөрәк ярасы – әтисез үсүе турында да әйтеп үткән.

«Исәннәрнең – кадерен, үлгәннәрнең каберен бел», – диләр. Менә әбекәй… Кунакка кереп чыктык әле яннарына. Бабай 1998 елда мәрхүм булды. Чардуганын алыштырырга кирәк. Аллаһы боерса, тиздән кайтачак. Бабай бик иртә китте, балачагым аның белән үтте.

Биредә әти ята… Мин аны беренче тапкыр 30 яшемдә күрдем. 1 сәгать тирәсе сөйләшеп, аралашырга өлгердек. Шул очрашудан соң ярты ел узгач, ул бу дөньядан китеп барды.

Әти мине тәрбияләүдә катнашмады… Урының оҗмахта булсын. Әйе, минем фамилиям дә әнинеке», – дигән ул.