Менә сиңа мә! Мәңге эссе Африканы кар баскан!

Көньяк Африка Республикасында көчле кар бураннары булган. Юллар ябылган, халык милкенә зыян килгән, дип хәбәр итә «The Citizen» җирле басмасы. Бу хакта «РБК» яза.

Газета мәгълүматлары буенча, көчле кар бураны Квазулу-Натал провинциясенең үзәк районнарын каплаган. 20 сентябрь көнне кич белән Йоханнесбург һәм көнчыгыш яр буендагы Дурбан шәһәрен тоташтыручы N3 трассасында күп кенә автомобильчеләр калган.

«Times Live» басмасы, автомагистральнең барлык 4 полосасы да тулган, дип яза. Кайбер машина йөртүчеләр үз автомобильләрен ташлап киткән. Юлны кардан чистартуга комачауламас өчен, аларны юлдан алып куярга туры килә.

Моннан тыш, кар кешеләрнең милкенә дә зыян китергән. Ледисмит шәһәрендә бер хатын-кыз кар аркасында күршесенең йорт түбәсе ишелүен сөйләгән. Кайбер районнарда кар яву аркасында мобиль элемтә дә юк.

Квазулу-Натал провинциясе хөкүмәте хәбәр иткәнчә, кайбер автомобильчеләргә җылы одеяллар һәм су китергәннәр, юлларда тоткарланып калганнарга гуманитар оешмалар ярдәм итә.

Көньяк Африка метеорология хезмәте синоптигы Лутандо Масимини сүзләренчә, берничә сәгать эчендә тагын да күбрәк кар яварга мөмкин. Илнең кайбер өлешләрендә һава торышы куркынычының кызгылт-сары дәрәҗәсе дип билгеләнгән.