38 яшьлек хәрби үз аягын үзе ампутацияләгән – видео

Якутиядәге «Пронедра.ру» сайты махсус операциядәге 38 яшьлек Александр тарихы белән таныштыра. Көчле яралану алган ир, үзен коткару өчен, соңгы чик дип әйтерлек адымга барган.

Атыш вакытында Александрның аягы яралана. Тирән окопта яткан сугышчыга иптәшләре дә ярдәм итә алмый – медицина ярдәме күрсәтү дә, сугыш урыныннан алып китү мөмкинлеге дә булмый. Ә хәле авырая бара. Берничә көннән аның аягы шешә, ялкынсына, ярасы бозыла башлый.

Александр әйтүенчә, аягы сизми башлый, үлекли, агуланып үлү куркынычы туа. Ул иптәшләренә аягын кисүләрен сорап мөрәҗәгать итә. Әмма аларның берсе дә бу адымга бармый – дөрес эшләмичә, иптәшләрен үтерүдән куркалар. Башка чара калмаганын аңлап, Александр үзе бу адымга бара.

Авыртуны бетерә торган препаратлар ярдәмендә ул үз аягын үзе ампутацияли. Бу – зур кыюлык кына түгел, зур төгәллекне һәм ихтыяр көчен сорый – чөнки аз гына ялгышу, әйтик операцияне ясаганда ярты юлда туктап калу үлемгә китерер иде.

Ампутациядән соң Александр окопта тагын 17 көн утыра – чөнки чолганыштан чыгу мөмкинлеге булмый. Куркыныч шартларда ул исән кала, һәм аны эвакуациялиләр. «Александр тарихы – нык ихтыяр көче һәм батырлык символы», – дип яза сайт.

Военкорлар Александрны «титан хәрби» дип атыйлар. Мондый хәлнең әлегә күзәтелгәне юк иде. «Күпләр өчен мондый адымга баруның нинди ихтыяр көче сораганын аңлавы да кыендыр. Мондый тарих хөрмәт уята, андый кешеләр турында белергә һәм сөйләргә кирәк», – дип яза журналистлар.