İlon Mask 2030-cu ilə qədər bir milyon insanı çipləmək niyyətindədir
Neuralink neyron modulu hazırda test məqsədi ilə yalnız bir neçə pasiyentində mövcuddur, amma İlon Mask bildirib ki, cəmi beş il ərzində çipin istifadəçilərinin sayı 1 milyona çatacaq. Həmçinin, o, gələcəkdə insan və maşın arasında məlumat mübadiləsinin sürətindən də bəhs edib.
İlon Mask öz proqnozunu X platformasında, texniki investor Apurva Agravalın Neuralink-i «onilliyin ən vacib şirkəti» olaraq qiymətləndirməsinə cavab olaraq paylaşdı. Bu açıqlama Maskın diqqətini çəkdi və o, iddialı proqnozunu paylaşdı.
«Məlumatların ötürülmə sürəti və pasiyentlərin sayı növbəti beş il ərzində hiper-eksponensial olaraq artacaq. Mən təxmin edirəm ki, 2030-cu ilə qədər məlumatların girişi və çıxışı üzrə ümumi ötürülmə sürəti 1 Mbit/s-dən çox olacaq, həmçinin «gücləndirilmiş» çip ilə insan sayının 1 milyonu keçəcək»,— Mask yazıb.
İndi Neuralink ilə pasiyentlər kompüter oyunları oynaya və kompüterdə sözün əsl mənasında düşüncə gücü ilə başqa əməliyyatlar edə bilərlər. Bu, beynin elektrik fəaliyyətinin çipin kompüterə simsiz ötürdüyü impulslarına çevrilməsi sayəsində mümkündür. Forbes jurnalının fikrincə, əgər məlumat mübadiləsi sürəti 1 Mbit/s-dən çox olarsa, o zaman nəzəri olaraq çip insana maşınlarla simbioza girməyə kömək edəcək.
The post İlon Mask 2030-cu ilə qədər bir milyon insanı çipləmək niyyətindədir appeared first on InfoCity.