«Вăрмана упрар»
Йăлăмри вăрмансем 2010-мĕш çулта пысăк инкеке лекнĕччĕ. Пушара пула йывăçсем гектарĕ гектарĕпе çуннă. Çут çанталăка пулăшас тĕллевпе çамрăксем тĕрлĕ акцие тухаççĕ. Çунса кĕлленĕ вырăнсене çӳп-çапран тасатаççĕ, çĕнĕ хунавсем лартаççĕ. Ырă пуçару яланах ăнăçлă та пысăк йышпа иртет. Çак канмалли кунсенче Атăл леш енче «Вăрмана упрар» акци вăхăтĕнче пĕр гектар ытла лаптăкра хыр лартнă. Ку пысăк та яваплă ĕçе влаç тытăмĕнче тăрăшакансем, студентсемпе волонтерсем хутшăнчĕç. Ăмăртмалла тенĕ пек пĕрисем çĕр чаваççĕ
<p>Йăлăмри вăрмансем 2010-мĕш çулта пысăк инкеке лекнĕччĕ. Пушара пула йывăçсем гектарĕ гектарĕпе çуннă. Çут çанталăка пулăшас тĕллевпе çамрăксем тĕрлĕ акцие тухаççĕ. Çунса кĕлленĕ вырăнсене çӳп-çапран тасатаççĕ, çĕнĕ хунавсем лартаççĕ. Ырă пуçару яланах ăнăçлă та пысăк йышпа иртет. Çак канмалли кунсенче Атăл леш енче «Вăрмана упрар» акци вăхăтĕнче пĕр гектар ытла лаптăкра хыр лартнă. Ку пысăк та яваплă ĕçе влаç тытăмĕнче тăрăшакансем, студентсемпе волонтерсем хутшăнчĕç. Ăмăртмалла тенĕ пек пĕрисем çĕр чаваççĕ, теприсем хунав хурса пыраççĕ. Хыра пĕлсе лартмалла, ĕç хатĕрĕсемпе те тĕрĕс усă курмалла. Чи кирли – тымарне амантма юрамасть. Унсăрăн вăл хăрса ларĕ. Хунавсене куçарса лартиччен питомникре вĕсене икĕ-виçĕ кун маларах хатĕрлеме пуçланă. Ĕçе пуçăниччен вăрманçă пухăннисем валли ăсталăх класĕ ирттерчĕ. Республика Пуçлăхĕ Олег Николаев экологи акцийĕ пĕлтерешлĕ пулнине палăртрĕ. Вăл хăй те ачаранпах вăрмансене упраса хăварас ĕçе хутшăнать. – Шкулта вĕреннĕ чухне те час-часах пире пĕтĕм шкулĕпе, класĕпе илсе тухатчĕç те çырмасене йывăçсем лартаттăмăрччĕ. Çав ĕç, ман шутпа, питĕ усăллă пулнă. Халь çав вырăнсене киле кайсан куратăп ĕнтĕ, самаях пысăк вăрмансем. Унта пыл хурчĕсене ĕрчетеççĕ. Çавăнпа та, паллах, чуна савăнтарать. Çитĕнекен ăру та пархатарлă ĕçĕпе çут çанталăка юратнине тепĕр хут çирĕплетрĕ. АНАСТАСИЯ ЕМЕЛЮКОВА: «Пирĕн студентсем хушшинче йывăç лартассипе те конкурс иртет. Кунта çур кун ирттерме никама та шел мар. Пирĕн автобусра вырăн та çитмест, автобуссем çитмеççĕ. Эпир кунта 25 çын. 700 хунав лартнă. Тен, нумайрах та». Тавралăха упрасси, илем кӳресси яланах сăваплă пулнă. Халĕ те ӳркенмесĕр тавралăха пĕр кун та пулин хăтлăх-тирпей кӳме уйăрсан йĕри-тавралăх тата та капăрланĕ, илемленĕ. Пилĕк авса ĕçлесен апат та тутлă. Кăнтăрла пурте вĕри пăтăпа сайланчĕç. 2021-мĕш çулта 740 гектар çинче вăрман лартма тĕллев лартнă. Ку кăтарту икĕ хут пысăкрах пулассине палăртаççĕ яваплисем. Экологи акцийĕ çулталăк вĕçлениччен татах та пулĕ, унта кашни кăмăл тăвакан хутшăнма пултарать. Елизавета Цветкова, Татьяна Трофимова, Сергей Емельянов</p>