Олимпиин наадануудай тоодо ородоггүй спортын зүйлнүүдые хүгжөөхэ боломжонууд Арадай Хуралда дурадхагдаба

Республика дотор олимпиин наадануудай тоодо ородоггүй спортын зүйлнүүдые хүгжөөхэ арга боломжонуудые зүбшэн хэлсэхэ талаар «дүхэриг шэрээ» Арадай Хуралда зарлаха тухай үүсхэл Арадай Хуралай дэргэдэхи залуушуулай палатын түлөөлэгшэ Алина Гненная һаяхан оруулба:

- Олимпиин, али бэшэшье гү спортын зүйл имагтал  олон хүнүүдэй нилээд удаанай хүндэ ажал мүн гэжэ бидэ булта ойлгонобди. Тиимэһээ олимпиин наадануудай тоодо ородоггүй спортын зүйлнүүдые республика дотороо дэлгэрүүлхэ, хүгжөөхэ, элитэ тамиршадые, тэдэнэй һоригшодые урмашуулха, тамиршадые бэлдэхэ байра байдал, арга боломжыень һайжаруулха гэхэ мэтын асуудалнуудые зүбшэлгэдэ табиха шухала болоод байна, - гээд Гненная һанамжална.

Энэ үүсхэлыень Арадай Хуралай регион хоорондын холбооной, үндэһэ яһатанай асуудалнуудай, залуушуулай политикын, ниитэ болон шажан мүргэлэй нэгэдэлнүүдэй талаар хорооной түрүүлэгшэ Цыденжап Батуев дэмжэбэ.

Мүнөөдэрөөр абахада республика доторной олимпиһаа буса спортын зүйлнүүд тухай асуудал үнэхөөрөөл туласа бодонхой, - гээд тэрэ тэмдэглээд, - Арадай Хурал залуушуулайнгаа палатада арга шадалаараа туһалха, - гэжэ найдуулба.