Ադրբեջանական պատվիրակությունը չի մասնակցել ԵԱՀԿ-ի ԽՎ նստաշրջանի աշխատանքներին
Ադրբեջանի խորհրդարանի փոխխոսնակ Բախար Մուրադովայի ղեկավարած պատվիրակությունը չի մասնակցել ԵԱՀԿ-ի խորհրդարանական վեհաժողովի աշնանային նստաշրջանին, որը տեղի է ունեցել Ուլան Բատորում:
«Այն բանից հետո, երբ ԵԱՀԿ/ԺՀՄԻԳ-ը որոշում կայացրեց Ադրբեջանում ընտրությունների ընթացքին հետևելուց հրաժարվելու մասին, ցանկացած քննարկում անիմաստ է», - ադրբեջանական APA գործակալության հետ զրույցում ասել է Մուրադովան:
Սեպտեմբերի 11-ին ԵԱՀԿ-ի Ժողովրդավարական հաստատությունների և մարդու իրավունքների գրասենյակը հայտարարել էր, որ հրաժարվում է դիտորդական առաքելություն իրականացնել նոյեմբերի 1-ին Ադրբեջանում կայանալիք խորհրդարանական ընտրությունների ընթացքում՝ իշխանությունների կողմից ներկայացված սահմանափակումների պատճառով: