Вугоршчына зьняла частку агароджаў на мяжы са Славеніяй

Улады Вугоршчыны абвясьцілі аб зьняцьці часткі драцяной агароджы на мяжы са Славеніяй. Раней Эўрапейскі Зьвяз расцаніў ўзьвядзеньне пагранічных перашкод на шляху ўцекачоў з Блізкага Ўсходу як парушэньне права на свабоду перамяшчэньня. Прынятаму ў суботу рашэньню Будапэшту папярэднічала аднаўленьне працы асноўнага пагранічнага пераходу паміж Харватыяй і Сэрбіяй.

Агенцтва Associated Press паведамляе, што захады па аблягчэньні перамяшчэньня празь межы ўжытыя праз два дні пасьля саміту ЭЗ, на якім абмяркоўваліся пэрспэктывы выхаду з крызісу. Прадстаўнікі 28 краін ЭЗ выказалі відавочную занепакоенасьць недахопам эфэктыўнага ўзаемадзеяньня саюзных дзяржаў і ўзаемнай нядобразычлівай рыторыкай.

Закрыцьцё вугорскімі ўладамі мяжы з Сэрбіяй, якое адбылося 15 верасьня, выклікала захады ў адказ з боку Бялграду, якія, у сваю чаргу, вымусілі каля 70 тысяч мігрантаў накіравацца па сэрбскай тэрыторыі да мяжы з Харватыяй. Там ім і ўдалося працягнуць падарожжа ў бок Аўстрыі, Нямеччыны і некаторых іншых эўрапейскіх краін, якія пагадзіліся даць ім прытулак.

Кіраўнік Радыё Бялград-1 Джорджэ Ўладзіч назваў зьмякчэньне адносінаў паміж Сэрбіяй і Харватыяй вынікам ціску Эўрапейскага Зьвязу на некаторыя дзяржавы, каб ліквідаваць супярэчнасьці і выпрацаваць адзіны падыход да вырашэньня праблемы ўцекачоў.