Витĕмĕ пур

Чăваш Республикин саккунĕсене ăçта йышăнаççĕ? Лару мĕнле чĕлхепе иртет? Влаç органĕсен ĕçне мĕнле йĕркеленĕ? Студентсен ыйту нумай, пурте кăсăклă. «Карьера кунĕсем» проект шайĕнче аслă шкулта вĕренекенсем Правительство çурчĕпе паллашрĕç. Саккунсене пĕлмелле, вĕсене тишкермелле тата тĕрĕс усă курмалла, çынсен ирĕкĕсене хӳтĕлемелле. Елена Константинова юрист профессине алла илет. Халĕ вăл 3-мĕш курсра вĕренет. Пĕрремĕш хут вăл студентсемпе пĕрле депутатсем саккунсем йышăннă зала – Чăваш Республикин Патшалăх Канашне – кĕрсе курчĕ. ЕЛЕНА КОНСТАНТИНОВА: «Питĕ интереслĕ пулчĕ çак зданире пулма. Мĕнле отделсем иккене пăхма. Эпир паян отдел управленине пăхрăмăр. Пире нормативно-правовой актсем ăçта пичетленине кăтартрĕç.Архивра, канцелярире пултăмăр. Ĕç мĕнле йĕркеленине кăтартрĕç». Виççĕмĕш курс хыççăн студентсен вĕренӳ планĕпе килĕшӳллĕн практика тухмалла. Елена ăна Чăваш Ен Пуçлăхĕн администрацинче ирттересшĕн. Илнĕ пĕлĕве кайран пĕр-пĕр министерствăра усă курасса шанать вăл. «Карьера кунĕсем» республикăри яшсемпе хĕрсене патшалăх тытăмне явăçтарма пулăшмалла. Проекта республика ертӳçи Олег Николаев пуçарнă. Кăмăлланă ĕçпе студент чухнех паллашсан унта вăй хума та ансатрах пуласса шанаççĕ çамрăксем те, ăна йĕркелекенсем те. Алексей Зотиков, Анна Цинтовская, Павел Иритков