Пушкин сăввисене вуларĕç

Вăл çырнă «Евгений Онегин» романа Белинский «вырăс халăх пурнăçĕн энциклопедийĕ» тесе хак панă. Сăмах Александр Сергеевич Пушкин пирки пырать. Çĕртме уйăхĕн 6-мĕшĕнче вăл çуралнăранпа 223 çул çитрĕ. Çак куна халалласа Чăваш Ен тĕп хулинче тĕрлĕ мероприяти иртрĕ. Сăмахран, Чăваш Республикин наци вулавăшĕн литература картишĕнче поэтăн пултарулăхне кăмăллакансем пухăнчĕç. Пĕремĕш Петĕр патша Александр Пушкин пултарулăхĕнче уйрăм вырăн йышăнать. Раççей пĕрремĕш императорне халалласа Александр Сергеевич тĕрлĕ хайлав çырнă. «Медный всадник», «Полтава», «Пир Петра Первого» тата ытти те. Çак тапхăра тĕпчеме, паллах, сăлтавсем пулнă. Ашшĕ енчи мăн аслашшĕне пăлхавра хутшăннăшăн айăпланă. Амăш енчи мăн аслашшĕ Петĕр патша патĕнче тарçăра пулнă. «Классиксем картишре» акцие хутшăнма кашнинех май пулчĕ. Александра Савельева поэтăн юратнă сăввине микрофон умне тухса вуларĕ. 16 çулти пике вулавăша кĕнеке илме килнĕ. Акци пирки пĕлсен сăвă вуламасăр чăтаймарĕ вăл. Пĕрисем сăвăсене микрофон умĕнче вуларĕç пулсан теприсем поэта хайнех каласа пачĕç. Настя Иванова та вĕсен шутĕнче. Пушкин сăнарне Чăваш Республикин тава тивĕçлĕ артисĕ Александр Смышляев калăпларĕ. Поэтăн сăввисене кашниех пĕлет темелле. Эппин, поэт яланах халăх асĕнче пулĕ. Алексей Зотиков, Анастасия Басникова, Георгий Кривошеин, Игорь Зверев