Хуçасăр йытă шар кăтартмалла мар

Чĕрчунсем – пирĕн çывăх туссем теççĕ. Анчах та вĕсем сывлăхшăн хăрушлăх кăларса тăратсан, чылайăшĕ урăхла шутлама пуçлать. Регион ĕç-хĕлне тимлекен центрта пĕлтĕр килсĕр йытăсем чăрмантарни пирки çырнине чылай шута илнĕ. Кăçал та ку енпе халăхран çăхавсем вĕçме чарăнмаççĕ-ха. Çур çул та çитмен, 400 çыру шута илнĕ те. Çивĕч ыйтăва уçăмлатас тесе Çĕмĕрлере 150 пуçлăх приют уçма хыснана тишкерсен 7 миллион тенке яхăн пăхса хăварнă. Проектпа смета хучĕсене кăçал чӳк уйăхĕнче вĕçлесе çитес çул çурта хăпартма пуçласшăн. Пĕрех ку ыйтăва куçран вĕçертмелле мар. Çавна май ăна Правительство çуртĕнче иртнĕ ларура та хускатрĕç. Килсĕр чĕрчунсемпе тимлес ĕçе лайăхлатма республика хыснинче çулсерен 10 миллион тенкĕ ытла пăхса хăвараççĕ. Кăçал 3 уйăхра çеç хуçасăр 466 чĕрчуна тытнă. Пĕлтĕрхи çак вăхăтри кăтарту 143-пе танлашать. Пурне те вĕсене уртаракан чиртен укол тунă. 396 чĕрчуна паллă лартнă. Палăртнă пур ĕçе те пурнăçланă хыççăн 330 чĕрчуна тытса кайнă вырăна каялла пырса янă. Хуçасăр йытăсене тытассипе сакăр районта лайăх ĕçленĕ. Улатăр, Элĕк, Йĕпреç, Хĕрлĕ Чутай, Сĕнтĕрвăрри, Муркаш, Вăрмар, Çĕрпӳ, Çĕмĕрле районĕсенче е пач та пурнăçламан, е сахал йытта тытнă. Çав вăхăтрах шăпах çак тăрăхсенчен çăхавсем нумай пулаççĕ те иккен. Йĕпреç районĕнче пурăнакансем ку ыйтупа пирĕн редакцие те шăнкăравласа пулăшу ыйтнăччĕ. Кăçал ку тăрăхра 4 йытта тытма 28 000 тенкĕ пăхса хăварнă. Чăваш Республикин Пуçлăхĕ Олег Николаев килсĕр чĕрчунсемпе тимлемелли яваплăха район ертӳлĕхĕн хăйĕн çинчен сирмелле маррине, ку ыйтупа ял тăрăхĕсемпе пĕрле ĕçлемеллине каларĕ. Ларăва пухăннисем хуçасăр йытăсене тытассипе малашне ятарлă учрежденине кайса кирлĕ хутсем çырмалла марри пирки те калаçрĕç. Чăваш Енре пурăнакансем килсĕр чĕрчунсене тытассипе мобильлĕ хушăмра заявка хăварма пултараççĕ. Çавăнпах паян республикăра пĕрлĕхлĕ иформаци системине тивĕçлĕ ĕçлеттерсе ярассипе тимлеççĕ. Çакă килсĕр чĕрчунсене шута илме, халăхран килекен заявкăсене туххăмрах йышăнма май парать. Хуçасăр йытăсене тытассипе тимлекен фирмăсем тӳрех çак çырусене курĕç, ветеринари ĕçĕсене ирттерме пултарĕç. Çавна май халĕ муниципалитетсенче килсĕр чĕрчунсене тытассипе камсемпе килĕшӳ тунине çак информаци системине кĕртессипе тимлеççĕ. Чăваш Республикин Пуçлăхĕ Олег Николаев цифра ресурсене тытса пырассинче çирĕплетнĕ йĕрке пулмаллине каларĕ. Çак çĕнĕлĕх йĕркелле ĕçлесе кайсан çынсенчен килекен çăхавсен хисепĕ самай чакмалла. Иван Иванов, Алина Сусметова, Юрий Марков