Արմեն Գրիգորյանը՝ Բերձորի ու Աղավնոյի մասին. «1,5 տարի ունենք, լուծումներ կգտնենք»
Նրա խոսքով՝ Արցախի իշխանություններն այս մասով աշխատանքներ են տանում։
«Մենք դեռ ժամանակ ունենք՝ եւ ճանապարհի մասով, եւ բնակիչների համար լուծումներ գտնելու, մոտավորապես 1,5 տարի դեռ ունենք: Արցախի կառավարության հետ կաշխատենք ու լուծումներ կգտնենք»,- նշել է ԱԽ քարտուղարը:
Արմեն Գրիգորյանն ասել է, որ երբ փորձել են առաջ տանել խաղաղության օրակարգը, խոսել են հնարավոր խնդիրների մասին։
«Այնպես չէ՝ երբ խոսում ենք խաղաղության օրակարգի մասին, մտածում ենք, որ ամեն ինչ շատ հեշտ է լինելու: Մենք գիտենք դժվարությունների մասին, բայց նաեւ հասկանում ենք՝ որպեսզի կարողանանք մեր տարածաշրջանում երկարաժամկետ անվտանգություն ապահովել, դրա հնարավոր տարբերակը խաղաղության օրակարգն է։ Մենք շարունակելու ենք աշխատել այս ուղղությամբ, բայց նաեւ հասկանում ենք, որ դա միայն Հայաստանից չէ կախված, նաեւ դա է պատճառը, որ աշխատում ենք միջազգային բոլոր գործընկերների հետ»,- ասել է Գրիգորյանը։