Ялти пурнăç лайăхланать

Коммуналлă хуçалăх тытăмĕ çĕнелет, вĕрентӳпе культура çурчĕсем хута каяççĕ, ял хуçалăхĕ аталанать. «Раççей ялĕ» проект яла тĕрлĕ енлĕ улăштарма май парать. Çамрăксене ялтах юлма майсем туса памалла, ĕç вырăнĕсем йĕркелемелле – проект шăпах çак тĕллевпе пурнăçланать.

Мăлатукпа шаккани аякранах илтĕнет. Строительсен ушкăнĕ ирхине ултă сехетрех ĕçе пуçăннă. Кунта мăйракаллă шултра выльăх валли техĕмлĕ апат хумалли шăтăк тăваççĕ.

СЕРГЕЙ СЕМЕНОВ: «Паян ĕнтĕ ирех бетон заливать турăмăр. Тепĕр машина килет, çавăнпа маларах вырăнне планировка туса хурасшăн».

80 метр тăршшĕ, 16 метр сарлакăш, 3 метр çӳллĕш пулать сенаж хывмалли шăтăк. Çĕре тикĕслемелле, хăйăр сапмалла, шалча çапса çип карса паллăсем лартмалла – ĕçлемелĕх пур. – Сенаж хывмалли шăтăка çĕнĕрен тумашкăн 10-12 кун кирлĕ. Çакăнта халь икĕ-виçĕ кунран ĕç вĕçленмелле те ĕнтĕ. Çитес эрнере ку шăтăка сенаж кĕрет. Пĕтĕмпе 4 000 тонна ешĕл масса вырнаçма пултарать. Çĕкленӳллĕ кăмăлпа ĕçленине палăртаççĕ Владимир Мылов, Сергей Семенов тата Вячеслав Сергеев строительсем.

ВЯЧЕСЛАВ СЕРГЕЕВ: «Малтан эпир Мускавра ĕçлеттĕмĕр. Хамăр бригадăпа. Малашне шутларăмăр хамăр районта ĕçлеме, мĕншĕн тесен çемьепе çывăхрах, район çывăхра. Кунта пире тӳлеççĕ, çемьепе пурăнас килет».

Малтан тăван килтен аякра укçа шыранă бригада 3 çул ĕнтĕ «Исток» хуçалăхпа çыхăну тытать, инçе çула каймасăрах çемьене тăрантма пултарать. Çывăх вахăтра вĕсен сенаж хывмалли икĕ шăтăк çĕнĕрен тумалла тата пĕрне тĕпрен юсамалла. Ял, хуçалăх, район аталанни, пурнăç шайĕ лайăхланни çынсене вырăнтах укçа ĕçлесе илме май парать те. «Раççей ялĕ» проектпа килĕшӳллĕн Чăваш Енре иртнĕ çул тĕрлĕ программăна пурнăçлама 5 миллиард тенкĕ уйăрнă. Кăçал республикăра ял территорине хăтлăх кĕртессипе 4, ял территорине комплекслă аталантарассипе 1 проект пурнăçланмалла. Халăх пуçарăвĕпе йеркелекен ĕçсем те ял сăн-сăпатне улăштараççĕ. Кăçал 896 вырăна çĕнетмелле: çулсем юсамалла, ача лапамĕсем тумалла, кану вырăнĕсене илемлетмелле тата ытти те. Алина Сусметова, Николай Скворцов