Microsoft-ը մտադիր է ChatGPT AI բոտը ներդնել Bing որոնողական համակարգում
Microsoft-ը ցանկանում է ներդնել ChatGPT-ն Bing որոնողական համակարգում՝ օգտատերերի հարցումներին պատասխանելու համար։
Այսպիսով, ընկերությունը հույս ունի ավելի լուրջ մրցակցություն ցույց տալ Google-ին: OpenAI-ի ChatGPT ծրագրավորողները պատրաստ են ընդլայնել իրենց համագործակցությունը կորպորացիայի հետ, գրում է The Information-ը։
Տեսականորեն արհեստական ինտելեկտի օգտագործմամբ չաթ-բոտը կկարողանա որոնման հարցման համատեքստին ավելի համապատասխան պատասխաններ տալ։ Սրանք կարող են լինել ոչ միայն համապատասխան տեղեկատվության հղումներ, այլ՝ ձեւակերպված արտահայտություններ, որոնք նման են մարդու արձագանքին:
Եթե Microsoft-ը ներդնի այս տեխնոլոգիան Bing-ում, ապա այն պետք է օգնի որոնողական համակարգին մրցակցել Google-ի եւ նրա Knowledge Graph վահանակների հետ, որոնք հայտնվում են որոշ հարցումների աջ կողմում:
[[gallery1]]
Դեռեւս հստակ հայտնի չէ, թե ինչպես է Microsoft-ը մտադիր իր որոնումներում կիրառել ChatGPT-ը։ Հավանաբար, սկզբում որոնման արդյունքների նման տարբերակները կփորձարկվեն օգտատերերի փոքր խմբերի վրա՝ իրենց իսկ ցանկությամբ։
Չնայած Google-ը մշտապես բարելավում է որոնման համակարգը սեփական ալգորիթմներով՝ ընկերությունը դեռ մտադիր չէ գործարկել ChatGPT-ի իր անալոգը։ Ավելի վաղ նրա ներկայացուցիչները հայտնել էին, որ չաթ-բոտերի օգտագործումը սպառնում է հեղինակության կորստի՝ տեխնոլոգիայի անկատարության պատճառով։
OpenAI-ի ղեկավար Սեմ Ալթմանը նույնպես հայտարարել է, որ սխալ կլինի մոտ ապագայում լրջորեն ապավինել ChatGPT-ին ցանկացած կարեւոր բնագավառում։
ChatGPT is incredibly limited, but good enough at some things to create a misleading impression of greatness.
— Sam Altman (@sama) December 11, 2022
it's a mistake to be relying on it for anything important right now. it’s a preview of progress; we have lots of work to do on robustness and truthfulness.
«ChatGPT-ն աներեւակայելի սահմանափակ տեխնոլոգիա է, նույնիսկ եթե այն արդեն բավական լավն է ինչ-որ առումներով, եւ այն աստիճանի, որ կարող է խաբուսիկ տպավորություն թողնել: Այս պահին որեւէ կարեւոր բնագավառում դրա վրա հույս դնելը սխալ է: Սա ընդամենը իրական առաջընթացի նախնական տարբերակն է։ Մենք պետք է քրտնաջան աշխատենք պատասխանների հավաստիության եւ ճշմարտացիության վրա», - գրել է Սեմ Ալթմանը: